Am Feeschter

Am Feeschter

I siah si höt noch dötta hocka

am Feeschter uf em Polschterschtuahl,

wenn i met mira Roggatäscha

bi z'schpringa ko grad us dr Schual.

D'Katz ischt da schnella Weg denn gfloha

met ama Schprung ufs Kanapee

und d'Bäsi hät den ufghört lesma

um mi i ihre Arma z'neh.

O d'Noodla hät si gleich versorget

und i ha ihra denn verzellt,

was mir ir Schual höt Neuis hen glernet

und d'Schwöster alls met üs hät gschpelt.

I hör mi s'erscht Gedicht ufsäga

vom schlaua Fuchs unde sira Lischt

und wia dr Igel met da Schtachla

ihm glich noch Mäschter ganga ischt.

Sether sind Johr um Johr verganga - 

dr Buab vo doo hät grau Hoor;

es wartet niamert meh am Feeschter -

und dennoch kunnts mir net lang vor.